नमू आत्मरूपास

नमू आत्मरूपास, बुद्धिप्रकाशा ।

स्थैर्यास, शुद्धीस देई गणेशा॥१॥

नमू चेतनेला, नमू शारदेला ।

वाणी धरो, सत्यप्रेमव्रताला ॥२॥

नमू भूमि आधार, सर्वा जनांना ।

क्षमाशील राहून, जगवी जिवांना ॥३॥

नमू सूर्यदेवास, नित्यप्रकाशा ।

कर्तव्य, सातत्य, देई गतीशा ॥४॥

फळेपुष्पपानास, वृक्षा नमूया ।

देतात सेवा, समर्पून काया ॥५॥

नमू वास्तुदेवा, नमू स्थानदेवा ।

कुलस्वामिनी, आद्य कुलदेवदेवा ॥६॥

नमू श्रीगुरूसंत, सन्मार्गसाथी ।

बहूभाग्ययोगेच, सत्संग देती ॥७॥

नमू कर्ममार्गा, नमू भक्तिमार्गा ।

नमू मुक्ति देती, तयां सर्व मार्गा ॥८॥

नमू ‘आज’ या, वर्तमानक्षणास ।

लाभे कृपेनेच, ये प्रत्ययास ॥९॥

नमू शुद्ध जाणीव, प्रकटे जिवांत ।

तो देव होवोत, स्थिर अंतरात ॥१०॥