डॉ सुहास पेठे यांच्या विषयी थोडेसे...
डॉ. सुहास पेठे तथा श्री पेठेकाका हे महाराष्ट्रातील सातारा येथे वास्तव्यास असणारे एक तत्वज्ञ संत आहेत. वयाच्या चौदाव्या वर्षी त्यांच्या आजीकडून त्यांना श्री गोंदवलेकर महाराज यांची शिकवण कळली. तसेच, त्याचवेळी योगायोगाने त्यांच्या एका शिक्षकांकडून त्यांना जागतिक कीर्तीचे तत्वचिंतक जे. कृष्णमूर्ती यांच्या अलौकिक विचारांचा परिचय घडला. तेव्हापासून आजवर एकीकडे नामसाधन व दुसऱ्या बाजूला ज्ञानमार्गाचा त्यांचा व्यासंग आजन्म सुरु आहे. श्री काकांनी तत्त्वज्ञान विषयातील विद्यावाचस्पती (पीएच्.डी.) ही पदवी, त्यांनी लिहिलेल्या इंग्रजी प्रबंधाने, सव्वीसाव्या वर्षी संपादन केली. वयाच्या अठराव्या वर्षापासून नोकरी करून त्यांनी हे शिक्षण व व्यासंग केला. लौकिक, प्रापंचिक कर्तव्ये सांभाळून अभ्यास, आचरण, प्रयोग व आत्मदर्शन असे टप्पे पार केले. त्याचबरोबर त्यांचा अनेक विषयांचा सखोल व व्यापक व्यासंग आहे. तर्कशास्त्र, मानसशास्त्र, अर्थशास्त्र, समाजशास्त्र, बँकिंग, मानवसंसाधन, साहित्यकाव्यशास्त्र, अकौंटन्सी- अशा अनेक शाखांचाही त्यांनी अभ्यास केला. त्यात काही शास्त्रांमध्ये पदवी, पदविकाही संपादन केल्या. या विविध विषयांत त्यांनी मानद आमंत्रित व्याख्याते म्हणून अनेक संस्थांत कार्य केले आहे. ७५ पुस्तके, २०० पेक्षा अधिक स्वानुभवाधिष्ठित अभंगांचे लेखन व सुमारे ४०० पेक्षा अधिक संतपदे यांना त्यांनी भावपूर्ण चाली दिल्या व त्यांचे गायन केले आहे. लहानथोर सर्व व्यक्तींना मार्ग मिळावा म्हणून श्री पेठेकाकांनी ३६ साधनशिबिरे, ७२ मासिक बैठका, मुले व युवकवर्ग यांच्यासाठी स्वतंत्र सत्रे, सर्वांसाठी प्रश्नोत्तर सत्रे, खासगी चर्चासत्रे, ३०० आकाशवाणी चिंतने, वृत्तपत्रीय लेखन व लेखमाला, ५०० बोधवचने, आत्मपरीक्षण सत्रे- असा हा व्यापक व अमूल्य ठेवा निर्माण करून जिज्ञासूंच्या हाती दिला. श्रीकृपेने त्यात अजूनही नवीन भर पडत आहे.
माणूस, सृष्टी यांची दु:खे व त्यांचा निरास - हे श्री काकांच्या कार्याचे केंद्रबिंदू असून, विविधांगी व्यासंगाचा त्यांनी अगणित व्यक्तींना विनामूल्य लाभ आजन्म करून दिला आहे. ते माणुसकी हा धर्म मानतात, जगतात व नम्रपणे सर्वांसमोर विविध माध्यमांतून तळमळीने ठेवतात.
श्री काकांचे हे नि:स्वार्थकार्य शांतपणे तेवणाऱ्या "नंदादीपा"प्रमाणे अविरत चालू असून त्या प्रकाशात आजवर अनेक साधकांचे जीवनपथ उजळून निघाले आहेत.