ओवीचेनि मिसे

ओवीचेनि मिसे, देव आठवावा ।

हृदयी धरावा, सर्वकाळ ॥१॥

सर्वकाळ मनी, स्वरूपाचा वेधु ।

तेणे भवसिंधू , तुटईल ॥२॥

तुटईल व्याधी, या जन्मकर्माची ।

जरी राघवाची, भक्ती घडे ॥३॥

भक्ती घडे भावे, सगुण देवाची ।

संगती देहाची, जव आहे ॥४॥

आहे देह तव, सगुणी भजावे ।

स्वस्वरूप व्हावे, आपणची ॥५॥

आपणची देव, आपणची भक्त ।

संतसंगे मुक्त, आपणची ॥६॥

आपणची सर्व, आपणची वाव ।

मीपणाचा ठाव, आपणची ॥७॥

आपण तूपण, जववरी अंतरी ।

तव भक्ती करी, सगुणाची ॥८॥

सगुणाची भक्ती,लोभाची विरक्ती ।

निर्गुणाची मुक्ती,सायोज्यता॥९॥

सायोज्यता मुक्ती, तुटला संदेहो।

बंधनेची वावो, दास म्हणे ॥१०॥