हाती माझे काय देवा

हाती माझे काय देवा कधी उमजेल ?

मी मी मी मी पिटतो डंका कधी हा थांबेल ? ॥धृ॥

ज्या देहाने करितो कर्मे

तो न माझे हाती

मी न जन्मा घातला तो

नाश करी नियती

पराधीन पायावरती इमला का टिकेल ? ॥१॥

मनबुद्धी असूनीया

दोन्ही हाती नाही

जुमानीना चराचर

लोकी सत्ता नाही

न करिता ‘मी केले’ हे कधी का घडेल ? ॥२॥

मी केले , मी करितो आहे ,

पुढे करणार

मिरवितो आजन्म मी

लोकी सांगणार

दीन म्हणे खरा कर्ता कधी आकळेल ? ॥३॥