संतांची आरती

गाऊ संतांची आरती । देव जागा करिती चित्ती ॥धृ॥

निर्गुण दुर्लभ देव झाला । त्यांनी सगुणात आणिला ॥१॥

स्वार्थी जीव जो गुंतला । त्याला परमार्थी लाविला ॥२॥ गाऊ..

खोटा कर्ता जो तो झाला । कोण कर्ता तो दाविला ॥३॥

प्रारब्धाची पुसली रेखा । यत्न देव हा ओळखा ॥४॥ गाऊ..

मिथ्या अशुद्ध देव गेले । शुद्ध देवांसी स्थापिले ॥५॥

सद्गुण स्वप्नीचे वाटले । त्यांनी जगुनीया दाविले ॥६॥ गाऊ..

लोकांसम हे जगती आले । मात्र मृत्यू पुसुनी गेले ॥७॥

सूक्ष्म रूपात राहिले । प्रमाण आजहि देती भले ॥८॥ गाऊ..

अपार बुद्धीचे सागर । केला सूक्ष्माचा व्यवहार ॥९॥

सोने मातीत दाखविती । मीपण सरता हाती देती ॥१०॥ गाऊ..

पैसा भपका केला दूर । साधेपणावरी भर ॥११॥

प्रेम नि:स्वार्थाचे भजन । अवघे त्यागाचे जीवन ॥१२॥ गाऊ..

त्यांच्या बोधाचे चिंतन । आम्हा घडो रात्रंदिन ॥१३॥

आचरणाची नित्य सेवा । दीन म्हणे घडो देवा ॥१४॥ गाऊ..

॥ सब संतन की जय ॥