भगवद्गीतेची आरती

जय देव जय देव जय भगवद्गीते ।

तापत्रय संहारुनि, वारि भवदुरितें ॥धृ॥

पार्थरथावरि बसले असता भगवान ।

त्यांच्या मुखकमळातुनि जालिसि निर्माण ।

तव श्रवणाच्या योगे पंडूनंदन ।

मोहातीत होउनि, जाला पावन ॥१॥

अष्टादश अध्यायी तूझा विस्तार ।

लेखनपठणेश्रवणे, उद्धरिसी नर ।

हरिहरब्रह्मा स्तविति, तुज वारंवार ।

अगाध महिमा नकळे कवणासी पार ॥२॥

श्रीकृष्णे काढुनिया वेदांचे सार ।

प्रगट केली ब्रह्मविद्या परिकर ।

सर्वहि विश्वजनांचा केला उद्धार ।

नीरंजनपद देउनि, हरिला संसार ॥३॥