वेद बोलियेला त्रिविध वचन

वेद बोलियेला त्रिविध वचन ।

कर्म उपासना आणि ज्ञान ॥१॥

ज्ञानाचा निश्चयो बोलिला वेदान्ती ।

आणि शास्त्रमति बहुसाल ॥२॥

बहुसाल शास्त्र पाहता सरेना ।

आयुष्य पुरेना जन्मवरी ॥३॥

जन्मवरी वाया संदेही पडावे ।

केधवा घडावे समाधान ॥४॥

समाधान घडे साधुचे संगती ।

गीताभागवती हेचि आहे ॥५॥

हेचि आहे सार जाणावे साचार ।

करावा विचार शाश्वताचा ॥६॥

शाश्वताचा भाव सर्वाठायी पडे ।

जरी काही घडे संतसंग ॥७॥

संतसंगे देव पाविजे तत्त्वता ।

शास्त्रे धांडोळिता आढळेना ॥८॥

आढळेना जनी दिसेना लोचनी ।

तया साधुचेनि पाविजेते ॥९॥

पाविजेते निजस्वरूप आपुले ।

मन भांबावले जिये ठायी ॥१०॥

जिये ठायी सर्व तुटती आशंका ।

तेचि लाभे एका साधुसंगे॥११॥

साधुसंग सत्य मानावा अंतरी ।

वेगी सोय धरी आलिया रे ॥१२॥

आलिया रे संग साधुचा धरावा ।

संसार तरावा साधुसंगे ॥१३॥

साधुसंगे ज्ञान रामदासी जाले ।

शरीर लागले भक्तिपंथे ॥१४॥