अंतरीची वेथा

अंतरीची वेथा श्रीरामासमर्था ।

जाणवल्या चिंता दूरी करी ॥धृ॥

जाणे सुखदुःख राम माझा येक ।

येर ते मायिक, वैभवाची ॥१॥

वैभवाची सखी, वोरंगोनि जाती ।

आत्माराम अंती, जिवलग ॥२॥

जिवलग नाही, श्रीरामावाचूनी ।

हाचि माझे मनी, दृढभाव ॥३॥

भाव अन्यत्रांचा, आहे वरपंगाचा ।

रामेवीण कैचा, अंतरीचा ॥४॥

अंतरीची वेथा, श्रीरामासमर्था ।

जाणवल्या चिंता, दूरी करी ॥५॥

करी प्रतिपाळ शरण आलियाचा ।

राम त्रैलोक्याचा, मायबाप ॥६॥

मायबाप धन, सज्जनसोयरा ।

येका रघुवीरावीण, नाही ॥७॥

नाही मज चिंता, श्रीराम असऽता ।

संकटी बोहाता, उडी घाली ॥८॥

उडी घाली मज, अनाथा कारणे ।

राम सर्व जाणे, अंतरीचे ॥९॥

अंतरीचे गूज, राम सर्व बीज ।

रामदासी निज, प्रगटले ॥१०॥