हेतु मनी धरिला

हेतु मनी धरिला । देवा, तव चरणी ठेविला ॥धृ॥

उद्धाराचा, उपासनेचा । सत्संगाचा, निजबोधाचा ।

मौनजपाचा, अभ्यासाचा । हेतु मनी धरिला ॥१॥

नको जगाच्या मागे जाणे । भ्रमात जगणे पुन्हा जन्मणे ।

येथुन आता सावध जगणे । हेतु मनी धरिला ॥२॥

निर्धाराचे अम्हा बळ चढो । सेवाजीवन मना आवडो ।

साधकसंगे साधन वाढो । हेतु मनी धरिला ॥३॥

संत अम्हांपरि देही आले । पुढे पहाता देवचि झाले ।

जाणुन घेऊ कसे जहाले । हेतु मनी धरिला ॥४॥

संतमार्ग हा कळून घेणे । मनापासुनी सदा वर्तणे ।

दीन म्हणे तव कृपा मिळविणे । हेतु मनी धरिला ॥५॥