अवघी इच्छा ही अनिवार

अवघी इच्छा ही अनिवार ।

फिरवी दारोदार ॥धृ॥

रोज उगवता सवेच येई ।

मावळले तरि सोबत राही ।

धरिते स्वप्नांचा आकार ॥१॥

ती जन्माचे कारण होई ।

तळमळ जीवा सदैव देई ।

व्यापुनि अंतरंग व्यवहार ॥२॥

सात्त्विक राजस असो कशीही ।

तृप्तीलाही पुरुन उरे ही ।

वाटे माया ही साकार ॥३॥

इच्छा अपुले मरण क्षणोक्षण ।

दीना धरि रे तू सावधपण ।

तरणे इच्छेचा व्यापार ॥४॥

स्वार्थी इच्छा नको ठेवणे ।

गुरुइच्छेने अथवा जगणे ।

नेइल निरिच्छता भवपार ॥५॥