श्री भावगीतेची आरती

जय जय प्रेमळ भावगीते, जय भगवद्गीते । गीते, जय प्रेमळ गीते ॥

बोध सुगम दिधलास बुद्धि दे, आचरणा माते । माते आचरणा माते ॥धृ॥

ऐन प्रसंगी बुद्धि फिरते । मोह, अहंता कशी भुलविते ।

करुनि समर्थन, स्वतःच फसते ।

कृष्णसंगती सावध करुनी, भक्तांना तारिते ॥१॥ भक्तांना तारिते..

कर्म, ज्ञान, संन्यास, योग वा । स्वधर्म अपुला जाणुन घ्यावा ।

रूढी, भ्रम बाजूला ठेवा ।

मग हृदयातिल आत्मशक्तिही, साह्याला येते ॥२॥ साह्याला येते..

खरे सार ती अनन्यभक्ती । आज्ञापालन ही शरणागति ।

संशय, तर्क, विकल्पही जाती ।

पापपुण्य-भ्रम-भेद-बंधने, विलयाला जाती ॥३॥ विलयाला जाती..

कृपा देववाणीची झाली । भाव मराठीतून बोलली ।

जगण्या सर्वां सुलभ जाहली ।

हे परमात्मन्, दीनांकडुनी, घ्यावी ही आरती ॥४॥ घ्यावी ही आरती..