श्रद्धेची आरती

श्रद्धेची आरती करूया निर्गुणसगुणाची ।

जाणीव देई जी सर्वांतील शुद्ध स्वरूपाची ॥धृ॥

मनबुद्धीला जाग देतसे ।

त्यांचे त्यांना स्थान देतसे ।

मर्यादांचे भान देतसे ।

ओळख देई आनंदाच्या विशाल जगताची ॥१॥

कसे, का, कुठे आपण आलो ।

मायेमध्ये रमून गेेलो ।

दिव्यत्वाचा हेतु विसरलो ।

स्मरण देउनी ध्येय गाठण्या दिल्या प्रेरणेची ॥२॥

सार्थक होण्या नरजन्माचे ।

देत जी दिशा,साह्य शक्तिचे ।

दीनजिवांना छत्र कृपेचे ।

श्रद्धा ती टिकुदेत, प्रार्थना, हीच आर्ततेची ॥३॥