श्री ब्रह्मानंदांची आरती (बेलधडी)

ओवाळू आरती गुरुवर ब्रह्मानंदांसी ।

आज्ञापालन, त्याग, विरक्ती, सेवाकार्यासी ॥धृ॥

बनशंकरिने प्राण वाचवुनि दिधले दर्शन ।

वेद, शास्त्र, वक्तृत्व, पुराणे झाला संपन्न ।

नश्वरतेने ईशप्राप्तिचे करुनि दिले स्मरण ।

मार्गदर्शना वेंकटापती झाले अवतीर्ण ॥१॥

म्हणती सद्गुरुविण ना गति रे, जा गुरुसी शरण ।

तेच पुन्हा श्री दत्तगुरूंनी करुनि दिले स्मरण ।

महाराज गुरु लाभताच तव सार्थक जीवन ।

उद्धरता नामाचे कळुनी आले महिमान ॥२॥

गुरुआज्ञेने पदव्या विद्या दिधल्या सोडून ।

नामासाठी जगला श्रींना प्रमाण मानून ।

ज्ञानोत्तर भक्ती अन् निष्ठा अनन्य ठेवून ।

ती निष्ठा दीनांस लाभु दे द्या इतुके दान ॥३॥