पर्जन्यप्रार्थना

विश्वंभरा, जगदीश्वरा, दासांवरती करुणा करा ॥धृ॥

कृमीकीटकांचा जनिता अमुचाही तूच ।

ऊन्ह पावसाळा चक्रे चालविशी तूच ।

वृक्षांची काळजी आहे तुजला तितुकीच ।

नभचर वा कोणी, सारे जगविशिही तूच ।

विसर जाहला तुझा पुरा, सावध नव्हतो आम्ही जरा ॥

दूषित केले तुझ्या घरा, कर्ते बनलो भराभरा ॥१॥

वायु शुद्ध नाही, आता पीकपाणि नाही ।

अतीवृष्टि कोठे, येथे मेघवृष्टि नाही ।

वृक्ष,वेलि,पाने,पेरे मरगळले पाही ।

आकाशी डोळे, आलो तुझ्या द्वारि पाही ।

चूक सुधारू स्मरू खरा, जीवनदायी तुझा झरा ।

अजाण आम्ही क्षमा करा, पाण्याचा वर्षाव करा ॥२॥

विश्वंभरा, जगदीश्वरा, दासांवरती करुणा करा ॥

विश्वंभरा, जगदीश्वरा, सृष्टिचक्र अनुकूल करा ॥