पंढरीचे उपकार

पंढरीचे उपकार जगावर पंढरीचे उपकार ।

कधी न जे फिटणार, जन हो, कधी न जे फिटणार ॥धृ॥

मायेला जे, भुलले जग हे ।

विकार, लोभे क्षोभत जन हे ।

त्यात शांत अवतार, विठूचा, त्यात शांत अवतार ॥१॥

स्वार्थ, क्षुद्रता गावे दिसती ।

नकाशात या जगात किती ती ।

परी मनी दिसणार, विठोबा, परी मनी दिसणार ॥२॥

प्रेम, थोरपण, विशालता ती ।

सज्जनांस जी जपते जगती ।

गुणरूपे आकार, देव धरि, गुणरूपे आकार ॥३॥

दीना, दुबळ्या, अपराधी वा ।

करिती जे कुणि त्याचा धावा ।

त्यांस सबळ आधार, निर्गुण, त्यांस सबळ आधार ॥४॥