तवरि रे तवरि

तवरि रे तवरि, परमार्थ स्वयंभ ।

जव पोटागीवरी, लोभ आला नाही ॥१॥

तवरि रे तवरि, अत्यंत सद्भाव ।

जव विशेष, वैभव आले नाही ॥२॥

तवरि रे तवरि, धीरत्वाची मात ।

जव प्रपंची, आघात जाला नाही ॥३॥

तवरि रे तवरि, डगमगीना कदा ।

जव देह्यासी, आपदा जाल्या नाही ॥४॥

तवरि रे तवरि, न घडे अवज्ञा ।

जव ते काही, आज्ञा केली नाही ॥५॥

तवरि रे तवरि, कडकडीत वैरागी ।

जव ते पोटी, भडागी जाली नाही ॥६॥

तवरि रे तवरि, ज्ञान ते सांगावे ।

जव ते न कुणी, मागावे अर्थ काही ॥७॥

तवरि रे तवरि, शब्दज्ञानसुख ।

जव संसारीचे, दुःख जाले नाही ॥८॥

तवरि रे तवरि, भवगजाचे भान ।

जव सद्गुरू पंचानन, देखिला नाही ॥९॥