विश्वात्मकाची आरती

विश्वात्मका तुजला देवा ओवाळू आरती ।

तुझ्या कृपेचा सदैव होवो बोधपाठ चित्ती ॥धृ॥

१

जन्मोजन्मी प्रपंच करुनी भागलो आता ।

माझे माझे भरुनी ओंजळ मोकळी आता ॥१॥

नातीगोती मानमान्यता पैसा पोकळ ।

स्वार्थी जगती कुणी न भेटे निखळ प्रेमळ ॥२॥

कल्पनेतले मिळण्यासाठी आजवरी श्रमलो ।

ज्याची त्याची कास धरूनी दूर किती गेलो ॥३॥

चैतन्यात्मक तुझीच होती प्रेमळ संगती ।

भान तिचे मज आले आता नित्य टिको चित्ती ॥४॥

२

निसर्गातले रूप अचेतन तसे सचेतन ।

कधी थबकलो नाही घेण्या तुमचे दर्शन ॥१॥

सुष्टदुष्ट वा क्षुद्रभव्य वा ऐलपैल भासो ।

तुजला प्रिय कण विश्वामधला कुणी कुणा त्रासो॥२॥

सर्वांचे हित नित्य घडावे हेतू तव ठायी ।

समग्रतेचे भान मला दे कृतीत अन् हृदयी ॥३॥

तुझे,तुझ्यास्तव,तव इच्छेने जगेन जीवन ।

दीन जिवांना तुझे घडू दे सदैव दर्शन ॥४॥