जय जयाजी रामराया करि कृपेची छाया

जय जयाजी रामराया करि कृपेची छाया ।

पंचारती ओवाळूनि करू कुरवंडी पाया ॥धृ॥

ब्रह्मयाच्या वरदाने दैत्यरावणकुंभकर्ण ।

अजिंक्य होऊनिया देव पीडिले संपूर्ण ।

सज्जनांसी भय झाले करि कोण संरक्षण ।

दितीकूळ तृप्त झाले भक्षुनीया ऋषीगण ॥१॥

भूभार हरावया रघुकुळी अवतार ।

कौसल्येेचे ठाई जाले परब्रह्म साकार ।

दाशरथी रामचंद्र मूर्ति सावळी सुंदर ।

देव पुष्पवृष्टि करिती अयोध्येसी जयजयकार ॥२॥

शेष सेवा करावया जाला बंधू लक्षुमण ।

ताटिकेसी मारियेले केले मखाचे रक्षण ।

शिवचाप भंगोनीया वरिली सीता सुलक्षण ।

भार्गवाचा गर्व हरिला येता अयोध्येलागून ॥३॥

पितृआज्ञे वनवास देवकार्यार्थ केला ।

सुग्रिवादि वानरांचा समुदाय मेळविला ।

पाण्यावरि दगडाचा दृढ सेतू बांधियेला ।

रावणाते दंडुनीया सीताशोक निवारीला ॥४॥

पुष्पक विमानात सितारामलक्षुमण ।

नळनीळ जांबुवंत सुग्रिव भक्त हनुमान ।

अयोध्येसि येते जाले भरतासि संबोधून ।

रघुराज गुरुपायी ठेवि मस्तक निरंजन ॥५॥