तिसऱ्या व अंतिम दिवसाचे प्रार्थनामंत्र

(भूमिका ऐकून व वाचून झाल्यानंतर उपस्थितमंडळींनी खालील प्रार्थनामंत्र सामुदायिकपणे म्हणावेत.गतव्यक्तीविषयीचे गुणस्मरण करावे.शेवटी कृतज्ञतेची तुळशीफुले वाहावीत.)

॥श्रीराम॥ 

॥ सब संतन की जय ॥

आत्मस्वरूप परमात्मन्, हे प्रभो, सृष्टिचालका ।

प्रार्थनापुष्पांस स्वीकारी, हे सद्बुद्धिप्रदायका ॥१॥

अवघ्या जगावरी माया, दया सर्वांवरी असे ।

जडावरी जसे प्रेम, चेतनविश्वावरी तसे ॥२॥

मनुष्यजन्म हा लाभे, त्याला ना तुलना असे ।

पुण्ये ना जाणतो अमुची, कर्तृत्व अमुचे नसे ॥३॥

भाग्याने देह हा लाभे, तीही केवळ तुझी कृपा ।

स्मरण घडणे कृपेचेही, आज आहे नवी कृपा ॥४॥

आकार देउनी आम्हा, धाडिता जन्म लाभला ।

जगती उचित ते पूर्ण, करण्या देह हा दिला ॥५॥

जाणून जगण्यासाठी, सावधान करी सदा ।

कालौघात स्वरूपाचे, भान राहोत सर्वदा ॥६॥

समान सम आनंदी, असता आम्ही सर्वही ।

विसरून तुला भगवन्, आणिले विविध स्वार्थही ॥७॥

भेदाने नटविली सृष्टी, तुझे ते बाह्य वैभव ।

निर्मिता अंतरी भेद, चुकतो आम्ही मानव ॥८॥

याची जाणीव देऊनी, भाग्याची कल्पना दिली ।

आचारधर्म शोधूनी, संतांनी प्रेरणा दिली ॥९॥

मानवी जन्म ही संधी, तसे पुढती कळे असे ।

देहाने व्यक्त जो होई, तोच अव्यक्त होतसे ॥१०॥

जन्माचे वेगळे सुख ना, मृत्यूचे दुःख ना असे ।

शुभाशुभ पुन्हा भेद, मानवी बुद्धिचा असे ॥११॥

जन्माने विसरतो देव, तो जन्म शुभ कोठला ।

मृत्यूने आठवे देव, पाहिजे शुभ मानला ॥१२॥

खरे तर असे भेद, कल्पना तर्क आणती।

आधी आहे, पुढे आहे,सच्चिदानंद ही स्थिती ॥१३॥

देहाची आकृती आणि, वासनादेह सोबत ।

हलके करणे चित्त, इतुके जीवनामृत ॥१४॥

आम्ही तुझ्यामध्ये होतो, येण्यापूर्वी जगात या ।

चैतन्ये आत वावरशी, असता आम्ही जगात या ॥१५॥

तसे आम्ही तुझ्यामध्ये, जाऊ विलय पावुनी ।

पुन्हा राहू तुझ्यामध्ये, सच्चिदानंद होउनी ॥१६॥

आम्ही जे आप्तसंबंधी, मित्रवर्ग, हितेच्छुही ।

घडले ज्यांस देहांतर, त्यांचे कृतज्ञ सर्वही ॥१७॥

निराकार परमात्मन्, मुक्त हा जीव परतला ।

एकत्वे पूर्ववत् नांदो, ‘तेथे’हा जीव ‘तेथला’॥१८॥

पृथ्वीचे मृत्तिका भस्म, करूया परत ते तिला ।

स्नेह, अक्षत राहू दे, भाव जल फुलातला ॥१९॥

॥ ॐ शांतिः शांतिः शांतिः ॥