उर्वरित पूजा आणि क्षमायाचना

महाभिषेक स्वीकारा देवा सिद्धिविनायका ।

स्नानानंतर आचमन, फुलाने पाणि द्या जरा ॥

रक्तवस्त्रे दोन दिव्य अर्पितो श्री विनायका ।

सर्वप्रदा घेई ती, लंबोदर हरात्मजा ॥

ब्रह्मसूत्र सुवर्णाचे यज्ञोपवित आणिले ।

उत्तरीय म्हणुनी घ्यावे, भक्तांना वर द्या भला ॥

कस्तुरीयुक्त हे चंदन केशरहि त्यात घातले ।

विलेपना सुरश्रेष्ठा घ्यावे चंदन हे भले ॥

द्विरदानना गणेशा या, आणिल्या लाल अक्षता ।

भाळीच्या चंद्रम्यावरती धारण करण्या गजानना ॥

शेंदूर हळदीकुंकू बुक्का अत्तर भूषणे ।

फुले, कमळे, पत्री, केवडा, तुळस वाहणे ॥

गणाधिपा नमू तुजला, उमापुत्रघनाशना ।

एकदंता इभवक्त्राला, मूषकवाहना तसे ॥

विनायका, ईशपुत्रा, सर्वसिद्धिप्रदायका ।

कुमारगुरु हे तुजला, दूर्वा वहाण्यास आणिल्या ॥

स्वीकारा धूपदीपाला, कर्पूरार्ती पवित्र घ्या ।

दक्षिणा, विडा, सुपारीही, फळे नैवेद्य अर्पिला ॥

विघ्नेश्वर, विशालाक्षा, सर्वाभीष्टफलप्रदा ।

प्रदक्षिणा अर्पितो मी, शुभ इच्छा पुऱ्या करा ॥

घडली जन्मान्तरी पापे, या जन्मी मजकडून जी ।

प्रदक्षिणा करी नष्ट पावलापावलात ती ॥

म्हणुनी घालणे एक स्वत:भोवती प्रदक्षिणा ।

नमस्ते विघ्नहर्त्याला, नमस्ते ईप्सितप्रदा ॥

नमस्ते देवदेवेशा, नमस्ते गणनायका ।

साष्टांग घालणे नमन, ऐसे म्हणुन विनायका ॥

मंत्रपुष्प तसा म्हणणे, करणे अंति आरती ।

क्षमायाचना या पुढली, करावी हात जोडुनी ॥

आवाहन न जाणे मी न जाणे स्तवना तव ।

पूजा न जाणतो मी हे ईश्वरा करि क्षमा मज ॥

तुजवीण नसे त्राता, ईश्वरा शरण मी तुला ।

तरी कारुण्यभावाने, रक्षी मजसि ईश्वरा ॥

रात्रंदिन किती करितो अपराध सहस्र मी ।

जाणून मी तुझा दास, क्षमावे मज ईश्वरा ॥

मंत्रहीन, क्रियाहीन, भक्तिहीन, सुरेश्वरा ।

पूजेत जे जसे केले, पूर्णत्वा नेइ ईश्वरा ॥

गेले पाप तसे दु:ख, गेले दारिद्य्र सर्वही ।

आली ही सुखसंपत्ती, तुझिया पुण्यदर्शने ॥

ज्याच्या स्मरण-नामाने, पूजा-यज्ञ-क्रिया तशा ।

न्यून संपूर्ण होती त्या, अच्युता नमु आजला ॥

जसे ज्ञान जसे शक्य, केले उपचार पूजनी ।

सिद्धीविनायकाला ते, प्रिय होवोत सर्वही ॥

आता सांगता सिद्ध्यर्थ ब्राह्मणपूजना करू ।

वायनेदक्षिणा सोडू, मागू आशीर्वचा तया ॥

झाले पार्थिव गणेशाचे प्रतिवार्षिक पूजन ।

अर्पण असोत सद्ब्रह्मा, ते माझे कर्मही नसो ॥

॥ श्रीराम ॥ (तीन वेळा म्हणणे.)

आरती म्हणणे.