श्री तुकोबांची आरती

ओवाळूया श्री तुकोबांना ।

जय, जय तनमनपावना ।

देवभक्तांच्या जीवना ।

आम्हा भक्तांच्या जीवना ॥धृ॥

जगजनात राहूनी ।

अवघे विपरीत साहूनी ।

संसाराची मजुरी करुनी ।

जोडियेले भक्तीधना ।

जोडियेले विठ्ठलधना ॥१॥

मद भ्रम केले दूर ।

भेद पाखंडा प्रहार ।

कोठे व्हावे कृपण, उदार ।

हाती दिले मर्मज्ञाना ।

हाती दिले ब्रह्मज्ञाना ॥२॥

साधकाची जपुनी दशा ।

कशी टाकावी ती आशा ।

मान कैसा अव्हेरावा ।

डोळा घातले अंजना ।

जगा लावीले भजना ॥३॥

दावियेले स्वहित कशात ।

साधनांची काय मात ।

दीनां गाथा हे अमृत ।

गाठी कैसे नर, नारायणा ।

याच जन्मी नारायणा ॥४॥