तपासुन घ्या अपुलं नाणं

तपासुन घ्या अपुलं नाणं । ऐका हो, घ्या अपुलं नाणं ।

संशय दूर करावा अंतरि । सांडुनि अभिमान ।

सख्यांनो, घ्या अपुलं नाणं, तपासुन घ्या अपुलं नाणं ॥धृ॥

चौऱ्यांशी खर्चुनिया मोले, घेतलं सोनं ।

तसंच न ठेवावं अपणा कळतं म्हणवून ।

चौकोनी कसवटीस पुरतं, पहा जे घासून ॥१॥

आपणापेक्षा वडील त्याला सद्गुरु म्हणवून ।

दाखवावं सोनं अंतर-गाठी सोडून ।

सरसनिरस पाहुनिया त्यांची, सांगेल तो खूण ॥२॥

तपासुनी न पाहाता शेवटी, होइल की हानी ।

टाकुनि हेमा बेगड धराल, झगझग पाहूनी ।

बरे बरे शोधा हे सांगे, सांगे निरंजन ॥३॥