श्री विष्णूची आरती

ओवाळूया जय नारायण विष्णु परब्रह्मा ।

जय जय विष्णु परब्रह्मा ॥

सहस्रज्योती उजळू गाऊ अगाध तव महिमा ।

देवा अगाध तव महिमा ॥धृ॥

अनंत वर्षे अगणित रूपे निर्मियली सृष्टी ।

देवा निर्मियली सृष्टी ॥

संकल्पाचा खेळ तुझा हा दिपवी जनदृष्टी ।

देवा दिपवी जनदृष्टी ॥१॥

जगड्व्याळ हा व्याप न कळतो अतर्क्य तव लीला ।

देवा अतर्क्य तव लीला ॥

कार्यकारणे जीवन घटना चक्रे चालविला ।

देवा चक्रे चालविला ॥२॥

थोर व्यास ते सहस्र नामे अपूर्व तव गाती ।

देवा अपूर्व तव गाती ॥

किती वर्णिले तरी पलिकडे तू व्यापुन उरशी ।

देवा तू व्यापुन उरशी ॥३॥

तूच ब्रह्म तू संहारक तू पालक तू होशी ।

देवा पालक तू होशी ॥

स्मरण-चिंतने दीनभक्त हे बंधमुक्त करिशी ।

देवा बंधमुक्त करिशी ॥४॥