श्री देवीची आरती

जगज्जननि हे जय जय माते, भावारति घेई ।

कृतज्ञतेने तव गुण गाण्या, मती अम्हा देई ॥धृ॥

कृपे शिवाच्या शक्तिरूप तव, अतर्क्य अवतार ।

तूच निर्मिशी या जगताला, तुझाच आधार ।

जगी रजावर तसा तमावर, तुझाच अधिकार ।

सत्त्व संकटी पडता करिशी, तमरज संहार ॥१॥

अंबा, दुर्गा, अन्नपूर्णा, तुळजामाता तूच ।

तू योगेश्वरी, तूच रेणुका, जोगेश्वरी तूच ।

काली, शाकंबरी, वैष्णवी, गौरी, लक्ष्मी तूच ।

अनेक रूपे अवतरशी तू, घरि आई तूच ॥२॥

अधिक्षेप तव कुठेहि न घडो, अमुच्या हातून ।

ठायी ठायी तुला पहाण्या, दे मंगल नयन ।

देव भेटण्या मार्ग तूच दे, माया भेदून ।

दीन जिवांची हीच विनंती, चरणा लागून ॥३॥