खंत वाटे देवा आम्ही झालो भूमिभार

खंत वाटे देवा आम्ही झालो भूमिभार ।

पदोपदी शिकूनिया अज्ञ राहणार ! ॥धृ॥

घडो घडी काळ जातो

पुन्हा संधी कोण देतो

सारे काही कळले तरी, वेळ दवडणार ! ॥१॥

क्षणो क्षणी सावध केले

जागे करुनी बोधविले

तरी नाही भानावरी, जगी रमणार ! ॥२॥

साधन आम्हा हाती दिले

देवा किती सोपे केले

किती काळ सबबी वरुनी, साधन चुकविणार ? ॥३॥

भूक दिली, अन्न दिले

खाण्यासाठी हात दिले

दृढ बुद्धी दीना देऊनी, न्या हो पैलपार ! ॥४॥